Paseos Camiño a Camiño do 10-11 de outubro: montes de Coruxo e de Saiáns

Na fin de semana do 10 e 11 de outubro os paseos interpretativos polos montes de Vigo dirixiranse cara os montes de Coruxo e de Saiáns. Esta iniciativa forma parte do programa Camiño a Camiño da Concellería de Medioambiente de Vigo, en colaboración con Montes de Vigo e Agrupación de Centros Deportivos e Culturais de Vigo. 

Vistas da cima dos montes de Coruxo dende o Monte dos Pozos

En Coruxo atoparémonos en Fragoselo para dividirnos en dúas rutas. A máis longa dirixirase polo sendeiro local cara ao Parque Forestal de Coruxo e o Maúxo Grande, na cima do monte. A máis curta achegarase máis tranquilamente ata a planta de tratamento de biomasa para logo atallar ata o Outeiro da Raposa. En ámbalas dúas, comprobaremos as consecuencias dos lumes de 2017 e o proceso de rexeneración que se está levando.

En Saiáns o punto de encontro é o parque forestal, dende onde se abordará o arboreto "Piñeiros do mundo" e logo os diversos atractivos recollidos na área etnoarqueolóxica de Saiáns (Muíños da Estea, Castro Alto da Medoña e a Fraga da Cal de Outeiro). No caso do paseo curto realizarase con tranquilidade e no caso do paseo longo, se o tempo acompaña, abordarase o Alto de Bandeira coas súas increíbles vistas.

En cada un dos paseos haberá dous niveis de dificultade para que sexa asequible a todo tipo de públicos.

SENDEIRO LOCAL DE CORUXO. 

✔ Sábado 10 de outubro

🏁 Punto de Encontro: Fragoselo (ver GOOGLE MAPS). 

👀 Hora de rexistro de entrada: 16:45. Hora de saída: 17:00. Hora finalización 19:15 (aprox)

🏃 Percorrido curto: 5,9 km, pendente media 8,2%, dificultade baixa | Percorrido longo: 8,6 km, pendente media 8,5%, dificultade media-alta

🎼 Actuación (19:30): Grupo Etnográfico A Buxaina (Música e Baille). A.C. Alalá (Música)

SENDEIRO LOCAL DE SAÍANS. 

✔ Domingo 11 de outubro

🏁 Punto de Encontro: Parque Forestal de Saiáns (ver GOOGLE MAPS). 

👀 Hora de rexistro de entrada: 9:45. Hora de saída: 10:00. Hora finalización 12:15 (aprox)

🏃 Percorrido curto: 3,1 km, pendente media 11,5%, dificultade media | Percorrido longo: 6,6 km, pendente media 10,9%, dificultade media-alta

🎼 Actuación (12:30): C.C.R. Cabral (Música). A.C.R.D. Pardavila (Música). A.F.C Asubío (Música)

INSCRICIÓN (100 prazas por paseo)

- Dende luns 5 outubro, no 010 (986 81 02 60 dende o móbil). Empadroados: de luns a mércores, de 8:00 a 20:00. Non empadroados: xoves previo á actividade.

- Cada participante pode inscribirse a un único paseo por fin de semana, podendo solicitar estar na lista de agarda do outro para o caso de que houbese prazas dispoñibles.

- No caso de non poder asistir unha vez inscrito/a, hase de comunicar en info@caminoacaminovigo.org ou no teléfono 662 23 10 23 para así convocar á lista de agarda.