Coa entrada do mes de Abril, a Concellería de Medio Ambiente de Vigo ten previsto dentro do programa de educación medioambiental Camiño a Camiño o ciclo "Sendas a carón dos monumentos naturais en pedra".
Trátanse de cinco rutas que pretenden dar a coñecer formacións en pedra de notoria singularidade en espazos paisaxísticos destacados de Galicia: Monte Aloia (8 abril, medio día), Pena Corneira en Leiro (15 abril, medio día), Monte Pindo en Carnota (22 abril, día completo), Pregamento xeolóxico de Campodola en Quiroga (29 abril, día completo) e Monte Galiñeiro (6 maio, medio día). Pena Coneira como o Pregamento de Campodola están incluídas no catálogo de Monumentos naturais da Xunta de Galicia.
Aproveitando estes percorridos abordaranse contidos relativos á paixase, aos monumentos naturais como figura de conservación, ás características xeolóxicas de Galicia e a súa dinámica dende Panxea ata a actualidade e outros temas relacionados.
Organización das rutas e novidades na inscrición
Para estas cinco rutas modifícase o horario da actividade pasando a ser a convocatoria as 8:00 e a saída as 8:30. Deste xeito, nas etapas de medio día agardase poder estar de volta sobre as 15:00 (agás o día do Galiñeiro que se chegaría antes por ser o Día da nai)
A inscrición realizarase como sempre no 010 (986 81 02 60 dende móbil) de luns a mércores (o xoves para non empadroados).
A novidade na inscrición consiste no sistema de pago (3 euros medio día e 7 euros día completo; 50% de desconte a menores de 12 anos). Modificando o expresado na publicidade, terá que facerse a través da Sede electrónica do Concello de Vigo no apartado Autoliquidación do pago de Actividades "Percorridos medioambientais". En principio está previsto que nun mesmo trámite se poidan efectuar os pagos de varios inscritos/as indicando simplemente nome e apelidos e percorrido. Dará opción para o pago con tarxeta ou para a impresión do impreso de autoliquidación e posterior pago nunha entidade bancaria autorizada.
Atención: Ata o luns 2 de abril non estará operativo e no momento de inscrición no 010 xa informarán en que momento se abrirá
Para poder participar na actividade é necesario presentar o xustificante do correspondente pago, habendo únicamente prazas de autobús para o número de prazas pagadas o venres pola mañá.
