 |
| Acto de presentación da X Andaina polos montes de Vigo |
O Alcalde de Vigo e a Concelleira de Medio Ambiente xunto con representantes de Montes de Vigo e Vegalsa-Eroski na presentación da X Andaina polos montes de Vigo.
O Alcalde de Vigo, Abel Caballero, presentou a Xª edición da Andaina polos Montes de Vigo, que terá lugar o vindeiro domingo, 11 de maio, e terá como punto de partida o Parque Forestal do Vixiador. Consiste nun encontro dos vigueses e viguesas co entorno no que viven en plena explosión da primavera, co obxectivo de superar os 1.000 participantes entre as tres modalidades de andaina (20km, 12km e 6km) e unha Peque-ruta (2km).
Ademáis, pretende dar a coñecer os recursos dispoñibles nos montes periurbanos de Vigo: parques forestais e sendeiros locais, onde nos podemos achegar ao patrimonio natural, así como algúns dos miradoiros e espazos etnoarqueolóxicos máis destacados da cidade.
Por parte do Presidente de Montes de Vigo, Uxío González, agradeceuse a iniciativa municipal que complementa outras accións que permiten pór a disposición da cidadanía servizos ecosistémicos como os servizos recreativo-culturais, servizos de regulación hídrica ou de regulación de CO2. Coa Andaina visibilízase esta realidade e permite experimentar a riqueza asociada cos montes de Vigo.
A Responsable de RSE de Vegalsa-Eroski, Irasema Dámaso, tamén salientou o traballo de educación ambiental que realiza a Concellería de Medio Ambiente a través do programa de Camiño a Camiño e a oportunidade de apoiar unha iniciativa moi asentada no concello de Vigo. Particularmente destacou a presenza de familias con menores. Vegalsa-Eroski aportará un kit de abastecemento para todos os participantes.
O prazo de inscrición estará aberto ata o venres 9 de maio, as 13 horas. Como é habitual realizarase a través do 010 (986810260 dende móbil), sendo preciso escoller unha das andainas previstas entre as catro dispoñibles para todo perfil de públicos.
Máis información no folleto (PREMER) e detalle das rutas (trazados, alzados, horarios) neste ENLACE
O evento conta co patrocinio de Vegalsa-Eroski, que contribúe a que se poida facer dun xeito máis agradable a través dos kits de avituallamento previsto ao longo do percorrido. Ademáis, a organización agasallará cunha camiseta conmemorativa a aquelas persoas correctamente inscritas.
O punto de encontro das actividades será o Parque Forestal do Vixiador (localización Google Maps), partindo dende este punto todas as andainas. No caso da "Andaina Longa" e "Andaina Media" empregarase un autobús lanzadeira que trasladará aos participantes ao punto de partida.
Inscrición e Funcionamento
Inscrición: Aqueles/as interesados en participar no X Andaina polos montes de Vigo pódense inscribir ata o 9 de maio as 13 horas no 010 (986 81 02 60 dende móbil).
No caso de que o día 11 de maio haxa prazas dispoñibles, poderase facer inscrición no Parque Forestal do Vixiador ata media hora antes do inicio da actividade.
Recollida de tarxeta de participación: previo ao inicio das actividades, as persoas inscritas recollerana na carpa de organización. A participación é gratuíta. No caso da Andaina Longa e Media dará dereito ao acceso ao autobús lanzadeira ata o inicio de actividade. No resto de actividades será solicitada ao principio das mesmas.
Agasallo a participantes: kit de abastecemento e promocional cortesía de Vegalsa-Eroski, xunto con entrega de camiseta recordatoria. Entregaranse no momento de solicitude da tarxeta de participación.
Inicio de actividade: segundo horario previsto na programación que se atopa na web caminoacaminovigo.org, sendo preciso estar rexistrado media hora antes.
Recomendacións: Roupa cómoda e calzado axeitado para monte, hidratación constante, respecto ás indicacións da organización, coidado do entorno empregando os contenedores habilitados e respectando a flora e fauna que se atope.
Regulamento: A inscrición nas andainas leva asociado a aceptación do regulamento da andaina (ver abaixo) e desprazarse ata o Parque Forestal do Vixiador, tendo que realizarse o correspondente rexistro. O non cumprimento do regulamento pode supor a suspensión da participación.
Cada participante configurará o percorrido que máis lle interese segundo a planificación das andainas, asumindo que o percorrido estará marcado previamente e se realizará de xeito autónomo.
No punto de saída iniciaranse as andainas co acompañamento de persoal de organización que encabezarán os grupos e que se verán reforzados en diversos puntos críticos ou travesías por voluntarios/as das distintas comunidades de montes polas que se transitan.
Máis información: info@caminoacaminovigo.org | whatsapp 662 23 10 23 | caminoacaminovigo.org
